O le tula’i so’o mai o le mataupu i tagata mai fafo ua fa’amaonia e le fa’amasinoga le galulue fa’asolitulafono i le teritori, na fesiligia ai e le ali’i fa’amasino o John L. Ward II, le itu a le malo, pe o i ai se gaioiga a le malo o faia e fofo ai lenei fa’afitauli.O se tasi o fautuaga sa tu’uina atu e le fa’amasinoga i le itu a le malo, o le molia o kamupani o lo o latou fa’a faigaluegaina tagata mai fafo e aunoa ma se fa’atanaga mai a le Ofisa o Femalagaaiga.O lea mataupu na alia’e i le taeao ananafi ina ua iloiloina e le fa’amasinoga le mataupu a le ali’i o Paepae Maae, lea na taofia mai e leoleo i le aso 25 o Novema i Fagaalu, ina ua tu’uaia o ia i lona save’uina o le filemu o tagata lautele.Na fa’ailoa e Maae i le Fa’amasinoga, o ia o lo’o faigaluega i le konekarate kamuta a se tasi o tamali’i o le atunu’u, le tofa ia Pa’u Roy Ausage, peita’i i fa’amaumauga a le Ofisa o Femalagaaiga o lo o atagai mai ai, o Maae na ulufale mai i le teritori i se pemita e 30 aso i le masina o Fepuari 2011, ma o lea pemita na muta lona aoga i le masina o Mati 2011.O se mataupu fo’i fa’apea na alia’e mai i le vaiaso na te’a nei, ina ua fa’ailoa e se ali’i na malaga mai i se pemita e 30 aso i le fa’amasinoga, o ia o lo o galue i se konekarate faufale i Tafuna.Na fiu le fa’amasinoga e fesiligia le igoa o le tagata e ana ia le konekarate kamuta lea sa galue ai le ali’i lea o Filipo Tuimaseve lona igoa, e le’i mafai ona ia fa’ailoaina i le fa’amasinoga.Saunoa Ward, e le o se taimi muamua lenei ua tula’i mai ai mataupu fa’apenei i luma o le fa’amasinoga, ma o nisi nei o mataupu o lo’o atugalu i ai le finagalo o le fa’amasinoga, i le tula’i so’o mai lea ae leai lava se gaioiga a le malo o faia i ai.Na fa’ailoa e Ward ia Maae, e le fa’atagaina ona ia galue i le teritori se’i vagana ua tu’u atu e le Ofisa o Femalagaaiga se fa’atanaga e galue ai ona fa’atoa mafai lea.“E tatau ona e usita’ia tulafono tau Femalagaaiga a le teritori, o tulafono tau Lafoga, atoa ai ma tulafono tau Saogalemu a le malo feterale, e ala i le tipiina lea o au saofaga i vaega e pei ona taua,” o le saunoaga lea a Ward ia Maae.Saunoa Ward, “E le o se fa’afitauli fou lenei ua feagai ma le fa’amasinoga, peita’i, o lo’o taoto atu pea le matafaioi a le vaega fa’amalosi tulafono latou te faia, ina ia mautinoa e o gatasi ma tulafono o lo’o lima ta’ita’iina ai faiga fa’avae tau faigamalo.”Na teena e le ali’i o Maae tu’uaiga o le fa’atupu vevesi i nofoaga faitele, ma ua toe tolopo ai loa lana mataupu e faia lea i le taeao nei, lea o le a fofogaina ai loa se maliliega latou te faia ma le malo, e aofia ai ma se aiaiga e toe fa’afo’i atu ai le ua molia i lona atunu’u, ae fa’amalumalu le tu’uina atu o se fa’asalaga a le fa’amasinoga e tusa ai o le solitulafono ua tu’uaia ai o ia.E $100 le tupe ua fa’atulaga e le fa’amasinoga e totogi ona fa’atoa mafai lea ona tatala Maae i tua a’o fa’agasolo ai lana mataupu i luma o le fa’amasinoga fa’aitumalo.O le vaiaso na te’a nei na toe fa’afo’i atu ai fo’i i Samoa se isi ali’i na malaga mai i se pemita e 30 aso i le masina o Me, ma aumau ai lava i le teritori seia o’o i le taimi na taofia fa’apagota ai o ia ona o tu’uaiga i le tu fua i le fanua o le isi aiga, atoa ai ma le fa’atupu vevesi i nofoaga faitele.E tasi le tausaga lea ua fa’asa ai Tuimaseve ona toe ulufale mai i le teritori, ae o lana salatupe e $150 ua poloaina e le fa’amasinoga lana sponsor na te totogiina.