TALI OMV I FAASEA A AVE TAAVALE FAASAGA I LAISENE

Ua fa’aalia e le pulega a le Ofisa o Taavale Afi a le malo i Tafuna (OMV) lo latou faaaloalogia o finagalo ma lagona faasea o ni isi o le atunuu e faatatau i le faafitauli o lo o tulai mai i laisene ave taavale, peitai o le faafitauli e mafua mai i le tuai lea ona taunuu mai o a latou o pepa (cards) mo laisene ave taavale mai fafo.

E toatolu ni tagata ave taavale na o latou faaalia i le Samoa News lo latou le fiafia tele, ina ua avea lea faafitauli ma itu e aafia atu ai ma i latou.

Na taua e le isi tina ave taavale e faapea, ua lua masina o fealua’i ma lana lisiti sa totogi mo le laisene ave taavale, ae ina ua taofi e se leoleo o ia i le vaiaso nei, na fiu e toe su’e lana lisiti ua leiloa, ma e umi se taimi o fai la finauga ma le leoleo ma i’u ina tuai ai i lana galuega.

“Ana i ai la’u laisene ave taavale atonu e faigofie ona foia le mataupu ma le leoleo, ae o le fealua’i ma ave lisiti o se mea ou te le masani ai, e le matagofie fo’i lea ituaiga faiga,” o le saunoaga lea a le tina ma lona leo ua le fiafia.

Ae na taua e Lee Vaouli o lo o pulea le OMV e faapea, ua fa masina talu ona uma latou ‘cards’ e fai ai laisene ma o lo o faatali pea i le latou oka mai fafo lea o lo o faamoemoe e tatau ona taunuu mai i le amataga o le masina fou.

SAUNI LE KOVANA MO FONOTAGA I UTAH

O le aso 28 o Iuni lea ua faamoemoe e usuia ai le fonotaga faaletausaga a Kovana a setete ma teritori i le aai o Utah, lea fo’i ua faamoemoe e toe malaga atu i ai le afioga i le kovana sili ia Lolo Matalasi Moliga.

O lea fonotaga e pei ona faamaonia mai e le tofa Iulogologo Pereira i le Samoa News, o le a talanoaina ai mataupu eseese e pei o auala e faamalosia ai sootaga i le va o setete ma teritori ma le vaega o lo o tuuina mai vaega tupe fesoasoani a le feterale: o le talanoaina o matuapu e faatatau i le soifua malolo: o atina’e: aoga faapea ai ma mataupu e fesoota’i ma fesoasoani tau tupe i falemai ma le soifua maloloina.

O le po o le aso Gafua na te’a nei na toe taliu mai ai i fanua le afioga i le kovana sili mai le fonotaga a Kovana e faatatau i auala e faaleleia ai aoaoga, le Governors Educational Symposium lea na usuia i Chicago i le lua vaiaso talu ai.

LAPATAIA SOIFUA MALOLOINA LE ATUNUU INA IA FAAPUPUNA LE SUAVAI

O le masalomia ai o le i ai o se fesootaiga i le suavai o lo o taumafa e tagata ma le gasegase o le ‘typhoid fever’ lea ua toe alia’e mai i le atunuu, ua toe fautuaina malosi ai e le Matagaluega a le Soifua Maloloina le atunuu atoa, ina ia faapupuna muamua le suavai i soo se taimi a’o le’i taumafaina, ina ia mautinoa e saogalemu mo le aiga i soo se taimi.

I se faatalatalanoaga ma le Faatonusili o le Matagaluega ia Motusa Tuilaeama Nua, na taua ai e le ali’i faatonu e faapea, talu ai o le talaaga o le gasegase lenei o le ‘fiva taifoi - typhoid fever’ i le tele lea o lona pipisi atu i le tino o le tagata tauala atu i le suavai taumafa, e fautuaina malosi ai le atunuu ina ia faapupuna suavai a’o le’i fa’aaogaina.

“Afai o e faaaogaina vaitimu, vai a le nuu, vaipuna po o suavai fo’i mai ofe tuai a le malo ma le nuu, e fautuaina tagata uma ina ia faapupuna muamua le suavai a’o le’i taumafaina, ina ia mautinoa o lo o saogalemu lou aiga mai ni faama’i e ono aafia ai outou aemaise lava i le fanau laiti,” o le saunoaga lea a Nua.

Na taua e le ali’i faatonu e faapea, o le toatele lava o i latou o lo o aafia i lenei faama’i o le fanau, o le ala fo’i lea e fautuaina ai matua ina ia mataala i soo se mea e i ai le fanau ina nei lo latou faatamala ma itu e aafia ai lo latou saogalemu.

Talu mai le masina o Ianuari seia oo mai i le vaiaso na te’a nei, e toa 8 tagata o le atunuu ua faamaonia mai e le falema’i o le LBJ ua aafia i siama o le faama’i lenei ma o le toatele lava o i latou o lo o aafia o le fanau.

Fai mai Nua, e sili lava le puipuia nai lo le tau togafitia.