“E LE O AAFIA NI FAIGA FAAITUAU PE FAAILOGA LANU”

Na teena e le ta’ita’ifono o le Komiti Faafoe a le Ofisa o Femalagaaiga, o Frank Gaisoa, ia tuuaiga o lo o faasaga ia latou o faia lea o lo o tu’uaia ai le komiti faafoe i le faailoga lanu.

“E leai se faailoga lanu i faaiuga uma o lo o faia e le Komiti Faafoe talu ona matou nofoia le nofoa, matou te le’i teenaina fo’i ni talosaga mai tagata mai fafo o lo o fia ulufale mai ma nonofo faavaitaimi i Amerika Samoa,” o le saunoaga lea a Gaisoa ina ua fesiligia e le Samoa News ananafi.

I ni faasea ua taunuu mai i le Samoa News, o lo o fesiligia ai le mafuaaga e auai so’o ai le loia a le malo i fono a le Komiti Faafoe, lea na saunoa ai Gaisoa, e leai se tulafono o faasa mai ai le auai o le loia a le malo i a latou fonotaga.

“E le saunoa le loia i le taimi o a matou fonotaga ma iloiloga, sei vagana taimi e manaomia ai sana fautuaga mo ni faaiuga a le Komiti, ona matou fesiligia lea o sona finagalo e faatatau i mataupu ma le tulafono e apalai i a matou faaiuga, ina ia aua ai nei tuai faaiuga e fai aemaise ai o le toe teena mai e le Loia Sili o ni faaiuga e mafua mai o le leai o se fautuaga faaloia o lo o aofia ai i totonu o se faaiuga e faia e le komiti faafoe,” o le saunoaga lea a Gaisoa.

Na saunoa foi Gaisoa e faapea, o se tasi lenei o gaioiga sa faia e le komiti faafoe ua mavae atu na mafua ai ona tuai ni isi o faaiuga fai i talosaga, o le le fesiligia o se fautuaga a se loia.  “O faaiuga uma a le komiti o lo o fai o lo o fulisia uma i ai finagalo o le komiti, e le o aafia ai foi ni faiga faaituau pe faailoga lanu,” o le isi lea saunoaga a le taitaifono.

I mataupu e faatatau i le iloiloina e le komiti o talosaga a tagata mai fafo, na taua e Gaisoa e faapea, e ui latou te le’i teena se talosaga a se tagata mai fafo o lo o fia ulufale mai e nofo i Amerika Samoa, ae o lo o latou matua iloiloina toto’a talosaga a pisinisi mo tagata mai fafo e fia ulufale mai e galulue i le teritori, ina ia mautinoa e le o aafia ai le tulafono i a latou faaiuga o lo o faia.

Mo se faataitaiga afai o tagata mai Samoa Tutoatasi o lo o fia ulufale mai i le teritori, e taga’i le komiti i le aofai o tagata mai Samoa e mafai ona talia i totonu o le kuata, ma a taumafai se pisinisi lotoifale e aumai ni ana tagata mai fafo, ona iloilo toto’a lea e le komiti talosaga i le auala e manaomia ai le tagata mai fafo e ulufale mai i le atunuu.

Na taua e Gaisoa i luma o le Fono i le masina o Aperila ina ua fesiligia o ia e tusa ai ma tofiga a le kovana e avea ma totino a le Komiti Faafoe, e ui o ia o le tagata faipisinisi peitai e na o le toalua lava tagata mai fafo o lo o ‘sponsor’ e lana pisinisi, ae o tagata fo’i e i ai agavaa faapitoa.

Na taua e Gaisoa i le Samoa News e faapea, o le manulauti a le komiti faafoe o le mulimulitai i tulafono ua maea ona pasia e puipui ai Amerika Samoa atoa ai ma tulaga tau femalagaaiga.

I lona talitonuga, afai sa faia e le komiti faafoe ua mavae atu ni isi o faaiuga e aafia ai le tulafono, e le o manatu le latou komiti e toe faaauau ia mea sese ia, sei vagana ai le naunau e faamalosia tulafono ma puipui le ulufale mai o tagata mai fafo i auala le sa’o.

“Afai e i ai ni faaiuga a le komiti ua faia e le o fiafia i ai ni isi o tagata faipisinisi, o le fautuaga, saili se loia e fautuaina oe ma ave le komiti faafoe i le faamasinoga,” o le fautuaga lea a Gaisoa.

A’o le’i malolo le Fono Faitulafono i le masina o Aperila na te’a nei, na o latou pasia ai sui e toalima na tofia e le Kovana e avea ma totino o le komiti.

O i latou nei e aofia ai Gaisoa Sr, Rev. Fred  Mamea, Sherry Butler, Moetulu’i Sipili Fuiava ma Rev. Aneterea Misioka.