Ads by Google Ads by Google

Toe fa’asa’oloto se ali’i na tu’ua’ia umia mariuana

O le ali’i talavou lea na taofia i le to’ese i Tafuna ao fa’atalitali ai su’esu’ega a leoleo ona o tu’uaiga i lona tuleiina atu lea o mariuana i isi tagata, ua fa’asa’olotoina nei mai tua o le to’ese, ina ua faia se fa’ai’uga a le malo o le a leai ni moliaga e faila fa’asaga i lea ali’i.

O le fa’ai’uga ua faia e le malo o se tala fiafia lea mo le ali’i na taofia i le falepuipui peita’i o se tulaga fa’anoanoa mo le Vaega a Leoleo o lo o taulimaina mata’upu tau Fuala’au Fa’asaina ona o lo latou taumafai malosi pea ina ia lepeti ma fa’aitiitia le fa’atupula’ia o lenei solitulafono i le atunu’u.

I fa’amaumauga a le fa’amasinoga na ta’ua ai e fa’apea, o se gaoioiga masani sa faia e leoleo i le vaiaso na te’a nei, e ala i lo latou fa’atulagaina lea o se tagata na te fa’atauina mai ni mariuana mai le ali’i lea.

E $30 le tupe na tu’u atu e leoleo i la latou tagata fa’apitoa lea na alu ma fa’atau mai mariuana mai le ali’i lea, ma afua ai loa ona aga’i atu leoleo ma taofia lenei ali’i ma auina atu ai loa i le to’ese i Tafuna e taofia ai, ao fa’atali le fa’amae’aina o le tusi saisai e taofia ma molia ai o ia.

I faiga masani, e 48 itula e taofia ai se tasi i le to’ese e fa’atali ai le malo mai lo latou failaina lea o moliaga ma le poloa’iga e taofia fa’apagota ai lea tagata i luma o le fa’amasinoga, peita’i e tusa ai ma ripoti mai le malo, e mae’a le 48 itula e lei sauni le malo mo le tu’uina atu o moliaga fa’asaga i lenei ali’i.

O le vaiaso nei la na fa’ailoa atu ai loa e le loia a le malo o Cabel Poag i luma o le fa’amasinoga fa’aitumalo e fa’apea, ua manatu le malo o le a leai ni moliaga e faia fa’asaga i le ali’i lea, i le mae’a ai lea o su’esu’ega sa faia e leoleo e uiga i lenei mata’upu.

I le mae’a ai ona fa’ailoa e le malo o lea tulaga i le fa’amasinoga, na faia ai loa ma le poloa’iga a le ali’i fa’amasino i le ali’i na loka ina ia alu loa i lona aiga, aua nei ona toe faia ni isi gaoioiga e ono toe a’afia ai o ia, ae maise ai lava le tagofia lea o fuala’au fa’asaina.

I se fa’amatalaga na maua e le Samoa News na ta’ua ai e fa’apea, o le ali’i lea, o se tasi lea o ali’i ua fai si leva o i lalo o le mea va’ai a le Vaega o Leoleo, ona o tala salatua ma masalosaloga i lona umia fa’asolitulafono lea o mariuana atoa ai ma lona fa’atauina atu i isi tagata.