Ads by Google Ads by Google

Tolu tuuga fautasi ua faamaonia ...

... mo le fu’a o lenei tausaga

E le fesiligia le faamalieina o le silasila a le atunuu i le sailiina lea o se siamupini mo falagamaea o le tai i lenei tausaga, ina ua faamaonia mai e le Komiti o le Fu’a i sana fonotaga i le vaiaso na te’a nei, o le a tolu tuuga fautasi mo le fu’a o lenei tausaga.

O tuuga e tolu e aofia ai le ulua’i tuuga lea o le a faia i le aso Toona’i o le vaiaso nei, aso 14 Aperila i le itula e 9:00 i le taeao, o le tuuga lona lua o le a faia  i le aso Gafua, 16 Aperila ma le tuuga lona tolu lea o le a faia i le aso Lulu, 18 Aperila e sailia ai le siamupini o lenei tausaga.

O tuuga fautasi, o se tasi lenei o faafiafiaga autu o sisigafu’a i tausaga taitasi, e le gata i Amerika Samoa nei, ae faapea ai foi ma le malo o Tutoatasi o Samoa.

I le faamanatuina ai o le 112 tausaga talu ona sisi le fu’a a le Iunaite Setete i laufanua o Amerika Samoa, ua avea lea o se aso e tuli mata’i i ai le silasila a le atunuu i polokalame ma faagaioiga masani, lea e pei ona i ai polokalame o le fu’a mo lenei tausaga.

I se saunoaga a le alii kovana sili ia Togiola Tulafono i luga o lana polokalame i le faaiuga o le vaiaso na te’a nei e faatatau i le sisigafu’a o lenei tausaga, sa ia fautuaina ai le atunuu atoa ina ia mafaufau loloto i le tulaga o le va feagai ai o Amerika Samoa ma le Iunaite Setete, talu mai le 112 tausaga talu ai.

“Ao amata ai ona faagaoi polokalame mo le fu’a o lenei tausaga, ia tatou mafaufau i ai i le matagofie o le tatou va fealoa’i ma le tatou malo faatina o le Iunaite Setete, ma ia fai sou finagalo e uiga i lea va feagai ai, poo lelei pea i lau silasila, po ua tatau ona fai se mafaufauga e tata’i i ai lenei mataupu,” o le saunoaga lea a le alii kovana.

“O lea ua 112 tausaga o nofo pea i lalo o le lima taitaiina o le malo tele, ae o lo’u taofi, ua tatau ona amata ona e mafaufau Amerika Samoa i lea tulaga, ina ia aua ne’i toe ta’ita’iina lou lima, ae savali lava oe ma ou lima, ma ta’ita’i e oe ia oe lava.”

O le ulua’i tuuga e 9 fautasi o le a tausinio ai, ona sailia mai ai loa lea o fautasi e 6 pito i luga, e tausinio i le tuuga lona tolu faatasi ai ma le vaa mai Samoa, le Tolotolo o Tama Uli mai Salelologa, lea na siamupini i le tuuga fautasi o le sisiga fu’a a Samoa i le 2011.

Ae o fautasi e tolu o le a le ausia le 6 pito i luga i le ulua’i tuuga, o le a tausinio i le tuuga lona lua i le aso Gafua, 16 Aperila, faatasi ai ma le va’a lona lua mai le afioaga o Fagaalu, lea ua faia i ai le faaiuga a le Komiti, o le a le tausinio i le uluai tuuga, ae o le a aofia ai i le tuuga lona lua.

O se tasi o mataupu sa fetufaa’i ai le komiti ma sui o fautasi i le fonotaga sa faia i le vaiaso na te’a nei, o se avanoa e mafai ai ona aofia le vaa lona lua a le afioaga o Fagaalu i le tuuga o lenei tausaga, ona o lea faatoa amata koleni le auvaa ma e ono le lava le taimi e tapena ai mo lenei faamoemoe.

O atugaluga o nisi o kapeteni sa mafai ona faaalia i le fonotaga, nei avea le le lava o tapenaga a le vaa lona lua lea a Fagaalu ma itu e ono faalavelave ai i nisi o fautasi ua leva ona sauniuni mai mo lenei faamoemoe.

E ui i le tele o finagalo na mafai ona fetufaai ai kapeteni ma le komiti, peitai o nisi o finagao sa agai i le tulaga lea, o tuuga fautasi e faatasi lava ona tupu i le tausaga, ma o se avanoa lelei foi lea i le auvaa lona lua a Fagaalu e fai ai so latou sao mo le fu’a o lenei tausaga.

Saunoa le Sui Failautusi o le Ofisa o Mataupu Tau Samoa e faapea, o le faaiuga ina ia auai le vaa lona lua a Fagaalu i le tuuga, sa tasi i ai le faafitiga o aleaga i se la fonotaga ma le Failautusi o le Ofisa o Mataupu Tau Samoa, le afioga Lefiti Atiulagi Pese, ma o le faaiuga foi lea o le a aloaia e le komiti.

Sa ia faamautuina foi i lea fonotaga le i ai lea o le malosi i le komiti na te faaleaogaina ai se fautasi e faalogogata pe le usitai foi i faatonuga o le tuuga.

O isi mataupu sa talanoaina e aofia ai tulaga o lesitala tai $300 mo fautasi uma o le a tausinio, ina ia mautinoa e faamaea uma atu a’o lei oo i le aso o le tuuga.

O le afiafi o le aso Toona’i na te’a nei na faatoa vaaia ai le vaa o le Tolotolo o Tama Uli ua agai atu i tai mo a latou aoga, lea foi na vaaia ai le to’atele o le atunuu na tumutumu i luga o le apitagalu i le fia maimoa lea i se tulaga ua i ai tapenaga a le Sa e tasi mai Samoa.

O le faasologa la o fautasi mo le uluai tuuga i le faaiuga o le vaiaso nei, ua tulai mai ai le Paepae Ulupoo mai Aua i le laina lona #9, lea e pito i Lauli’i; Fealofani Samoa mai Fagasa i le laina #8; Samoana Sharks i le #7; Fetu o le Afiafi mai Fagaalu i le #6; Matasaua II mai Manu’a i le #5; Aeto mai Pago Pago i le #4; Satani mai Nu’uuli i le #3; Iseula mai Fagatogo i le #2, ma le Fua’o mai Vatia i le #1, poo le pito lea i le malae vaalele i Tafuna.