Ads by Google Ads by Google

Tu’uaia i le gaoia o tupe mai le kamupani a le DGX

E lua moliaga mamafa, ua tuuaia ai e le malo ia Crystal Teo, lea sa avea ma Pule o se kamupani o lo o latou aumaia ni oloa i le atunuu, le DGX (Dependable Global Express.  O nei moliaga e mafai ona faasala ai se tasi i le toese mo le umi e le silia i le 7 tausaga, pe faasala foi i se faasalaga tupe e  le silia i le $5,000 mo le  moliaga e tasi.

O le aso 6 o Aperila 2012 na fa’amalolo ai Te’o mai i lana galuega.

O lo o masalomia ia le fa’aaogaina e Te’o o ni siaki a le kamupani e totogi ai sana ta’avale mau totogi (rental).

O le aso 10 o Aperila, lea o lo o ta’ua i fa’amaumauga a le fa’amasinoga, na faila ai e le pule fou a le DGX ia se tagi i le Ofisa a Leoleo, e fa’asaga ia Te’o, ina ua masalomia lona fa’aaogaina o se vaega tupe a le kamupani, e aunoa ma se fa’atanaga.

O le alii leoleo su’esu’e ia Det. Poutoa Jr I’amanu na tofia na te suesueina lenei mataupu.

O lo o ta’ua i le taofi a le malo e fa’apea, na faia e Te’o, i se auala e le’i fa’atagaina, lona fa’aaogaina o siaki a le DGX, e totogi ai pili i pisinisi tua, e pei o le kamupani a le ‘Tautai Rental’, ma ia fa’ailoa atu, ua mae’a ona ia maua le fa’atanaga e faia ai lea tulaga.

E tusa ai ma faamaumauga mai le DGX na tuuina atu i le ofisa o leoleo, o lo o taua ai e faapea, e silia  ma le tausaga o faaaoga e Te’o le ta’avale mai le Tautai Rental, ae ia fa’aaogaina se tupe a le DGX, pe a ma le $40,000, e totogi ai.

Na taua e le pule fou a le DGX i leoleo, e lei i ai se taimi na faaaoga ai e le latou kamupani le taavale lea, sei vagana ai lava taimi e alu atu ai Te’o i totonu e faigaluega, ona faatoa vaaia lea o le taavale.

Sa faapea foi ona maua  mai i se pamu kesi i Nuuuli, se siaki e $5,000 sa totogi atu mo le utuina o le taavale lea sa faaaoga e Te’o.

O lo o taua foi i faamaumauga a le  faamasinoga e faapea, i le aso 8 o Aperila 2012, na faaaoga ai e le ua molia lana imeli mai le kamupani e tusi atu ai i se sui o le kamupani a le Tautai Rental, e faailoa i ai o ia ua le o toe faigaluega i le DGX, ma e manaomia se isi e alu atu e piki mai le taavale mai lona fale.

Fai mai faamaumauga a le malo, talu mai le  aso 12 o Fepuari 2010 e oo mai ia Aperila 6 2012, e tusa ma le $24,725.00 le tupe sa totogi atu e le ua molia i le kamupani fai taavale a le TAUTAI, ae tusa ma le $900.47 sa ia totogia i le Nuuuli Service Station.

E $25,000 le tupe lea ua faatulaga e le faamasinoga e tatala ai le ua molia i tua, ma ua faamoemoe o le taeao nei o le a tulai ai le ua molia i luma o le faamasinoga faaitumalo mo le ulua’i taimi.