Mai le tele o ni isi o polokalame ua finagalo le faigamalo e fa’aaua pea mo le sisiga fu’a o lenei tausaga, ua finagalo le afioga i le ali’i kovana ia Lolo Matalasi Moliga ina ia fa’aauau pea ona tufa fua pepa mo taumafataga a le atunu’u i le aso o le fu’a, o se fuafuaga na amata mai lava e le faigamalo a Lolo ma Lemanu talu ona le la ulua’i fu’a o le tausaga e 2013.

O le fonotaga a le Komiti o le Fu’a mo lenei tausaga, lea fo’i sa auai le afioga i le ali’i kovana i le aso Faraile na te’a nei, na fa’alauiloa ai e le Komiti ni isi o tulaga ua ma’ea ona fa’atulagaina mo sauniga o le fu’a.

O polokalame fa’atulagaina o le fu’a e aofia ai fa’aaliga a pisinisi ma le aufai fa’atoaga, lea ua fuafua e faia i le malae o le Su’iga’ula a le Atuvasa i Utulei, amata mai i le aso Gafua e oo atu i le aso To’ona’i, Aperila 11-16, 2016, mai le itula e 1:00 i le aoauli e oo atu lava i le itula e 8:00 i le afiafi.

O le aoauli o le aso Gafua, Aperila 11 i le itula e 1:00 lea ua fa’atulaga e tatala aloaia ai loa fa’afiafiaga o le fu’a, e aofia ai pese ma ta’aloga, lea ua fa’amoemoe e fa’atautaia e le Matagaluega o Tupulaga Talavou ma Tina, fa’apea ai le Ofisa o Tu ma Aganu’u.

O le taeao o le aso Lua, aso Lulu, aso Faraile ma le aso To’ona’i o le vaaso lava lea ua fa’atulaga e faia ai tuuga fautasi, e saili mai ai Sa mo le sailiga siamupini i le aso Toona’i.

O le afiafi o le aso Lulu, aso Tofi ma le aso Faraile ua fa’atulaga e faia ai fa’afiafiaga masani o le fu’a mo ausiva ma aufai pese eseese, i lalo o le fa’atautaiga a le Ofisa o Tu ma Aganu’u, e pei ona fa’amaonia e le afioga i le ali’i fa’atonusili ia Uta Dr. Laloulu Tagoilelagi.

O le isi fonotaga a le Komiti o le Fu’a i le fa’aiuga o le masina nei ua fa’amoemoe e fa’amautu ai loa le aofa’i o ausiva o le a fa’afiafia i fa’afiafiaga o le fu’a o lenei tausaga.

O le po o le aso Faraile ua fa’atulaga e faia ai le Taamilosaga o Fusuaga i le va o le au fusu mai Samoa ma le ‘au filifilia mai Amerika Samoa nei, i lalo o le fa’atautaiga a le Asosi Fusuaga a Toleafoa Henry Tavake.

E tusa ai o le saunoaga a Toleafoa, e 13 tama fusu ua fa’amaonia le aumai mai Samoa, e aofia ai tama fusu fa’a amateur e to’a 11 ma tama fusu fa’apolofesa e to’a 2.

O tama fusu fa’apolofesa e to’alua mai Samoa e aofia ai Tony Iapesa, lea ua fa’amoemoe e fetaui ma Sui Palauni, ae o Gogosina Ulutoa mai Samoa o le a fetaui ma Riley Tuala o Amerika Samoa. O fusuaga o le fu’a ua fa’atulaga e faia i le Bowling Alley i le itula e 7:30 i le afiafi.

O le sauniga o le fu’a ua fa’atulaga e faia i le Fale Laumei i Utulei i le afiafi o le aso Sa, Aperila 17 i le itula e 4:00 i le afiafi, ao lumana’i ai sauniga aloaia o le sisiga fu’a i le taeao e sosoo ai, le aso Gafua, 18 Aperila.

O ni isi o polokalame ua mae’a ona fa’atulaga mo le aso o le sisiga fu’a e aofia ai le tu’u atu o le avanoa i tagatanu’u mo le sisiina o tagavai a le Iunaite Setete ma Amerika Samoa.

O sui o Tama ma Tina matutua ua fa’atulaga e sisiina le tagavai a le Iunaite Setete, ae o sui o tupulaga ua fa’atulaga e sisiina le tagai a Amerika Samoa. E fa’apena fo’i i le faitauina o le poloaiga fa’alaua’itele a le kovana mo le sisiga fu’a, ua fuafua o se sui o Tagata Matutua e faitauina le fa’a Samoa, ma le fa’aperetania lea ua fa’atulaga e faitauina lea e le tama’ita’i sa siamupini i le Tauvaga Sipela Upu a aoga tulaga muamua, le tama’ita’i o Debrina Alaia Su’a mai le aoga tulaga muamua a Manulele, e fai ai o ia ma sui o fanau ma tupulaga laiti.

O saunoaga fa’apitoa o le aso o le fu’a e aofia ai le saunoaga mai le afioga i le ali’i kovana, fa’apea ai ma le sui failautusi o le Ofisa o le Initeria ia Esther Kia’aina.

O le susuga i le Ta’ita’i Matagaluega a le Ekalesia Aso Fitu o le Toe Afio mai i Amerika Samoa ia Pr. Uili Solofa, o le a ia ta’ita’ia le sauniga o le fu’a mo lenei tausaga.

O le mae’a ai o savali fa’aaloalo o le fu’a, ona sosoo ai loa lea ma le fa’afiafiaga mai le aoga a Fa’asao/Marist, mo le fa’alauiiloaina o a latou fa’afiafiaga lea ua fa’amoemoe e fa’aali i Guam, i le Fa’aaliga lona 12 o Tu ma Aganu’u a le Pasefika lea o le a fai ai i latou ma sui o Amerika Samoa.

O le Fa’afiafiaga mai le Falelima i Manu’a e pei ona fai ai Ofu ma Olosega ma o latou sui o le a sosoo ai, mulimuli mai ai i tua le fa’afiafiaga mai le Falelima i Sasa’e e pei ona tapena mai i ai le afioaga i Nu’uuli, ogatotonu ai le aufa’afiafia mai Samoa, ma taualuga ai loa e le fa’afiafiaga mai le Falelima i Sisifo, e pei ona tapena mai i ai le afioaga i Leone.

O le mae’a ai o fa’afiafiaga o le fu’a ona taualuga ai loa lea i fa’aaloaloga masani atoa ai ma le tufatufaina o fa’ailoga mo tuuga fautasi ma au fa’afiafia.