Ads by Google Ads by Google

UAEALESI MOSOOI A LE FAFIGE FAIKAKALA

TELE PEA FESILI FIA MALAMALAMA I AI LE ATUNU’U

 

Maua i le uaealesi mosooi a le Fafige Faikakala le anoanoa’i o le mau fesili o lo o fia malamalama i ai le atunu’u i le taimi nei, i taualumaga ma fa’agaioiga o le malo, e pei la o le fesili lenei, “O afea ea e maua ai siaki o lafoga toe fa’afo’i a tagata faila lafoga”. Pei o se Leona tagi le Fafige Faikakala i le fealualua’i ma tu’u fesili solo i ofisa o le malo o lo o gafa ma lenei matafaioi, i le fia maua lea o se tali. Tomumu le isi fafine talavou sa alu atu e siaki lana lafoga pe ua maua ae fa’ailoa ane i ai e se tagata faigaluega a le Ofisa o Lafoga e le’i maua lava ni siaki, fai mai loa ma le tomumu a le tina talavou lea, “aisea tou te le fai mai sa’o ai e le o i ai se tupe e fa’atupe ai siaki mo lafoga”. Fa’aauau atu le savali a le Fafige Faikakala i le isi tulimanu o le fale o le malo i Utulei, ae toe taia ai fo’i iina lana fa’alogo i le tomumumu o isi tagata sa o atu e siaki a latou lafoga fai mai, “mafua’aga tonu lava lea e ala ai ona faila e tagata a latou lafoga i fafo, ona e fai o le fiu e fa’atali ae aumai fo’i e le atoa se ta’i $500 o siaki e maua”. O le fautuaga a le Fafige Faikakala i le malo, alofagia le tagi atu e le atunu’u, ma ia tautuana folafolaga sa faia i le ulua’i taimi na e augani mai ai i le atunu’u mo lana palota, e fa’amuamua lava tagata i mea uma, ao lea ua foliga mai, ua le fa’amuamua tagata ae “ua fa’amuamua lau taga”. Ia manuia Amerika Samoa i lenei vaiaso.

 

UMA LE FA’AIPOIPOGA AE TOMUMUMU SUI O AIGA

 

E fetaui lava le saofa’i atu i lalo o le Fafige Faikakala e fia matamata i sauniga o le fa’aipoipoga a se tasi o ulugali’i fou sa faia i le vaiaso na te’a nei, ae taia loa i lana fa’alogo le talanoaga tu’u mumusu a isi loomatutua e to’alua o lo o saofafa’i i le pito i tua o le fale, o lo o muimui ma fai tala o sua a le aufaigaluega lea ua amata ona ta’i i taimi sa faia ai fa’aaloaloga. E pisa lava la loomatutua, ae o lo o usi lelei le matamata a le Fafige Faikakala i le fia matamata i le aulelei ma le matagofie o foliga o le ulugali’i fou, ma ua toe totogo a’e ai lagona fia fa’aipoipo o si Fafige Faikakala, ae paga lea ua misi le va’a. O le te’i o le fa’alogo a le Fafige Faikakala i le mataupu lea e talanoa i ai loomatutua e to’alua ia e saofafa’i i ona tafatafa, na mafua ai lona ona fa’alaula lautaliga lautetele o le Fafige Faikakala i lona fia maua o le ‘au o le paipa, ae poo le a fo’i le mea lea e tomumumu ai le au loomatutua ia. Te’i le fa’alogo a le Fafige Faikakala ina ua maua i lana fa’alogo, fai mai o lo o tomumumu le aiga o si tama fa’aipoipo ina ua fiu lona aiga e autilo mea e tele sa latou tapenaina mo le la aso fiafia e pei o pisupo ta’i 6 pauna ma ta’aiga ie foliga manaia sa tapena e ta’i ai sua a susuga i Faifeau, ae emo ane le ata, ua tu’u e le aiga o le tama’ita’i fa’aipoipo pisupo ta’i 6 pauna ae fa’aaoga pisupo ta’i 12 aunese e ta’i mai ai sua, toe tu’u ma ta’aiga ie mata aulelei sa o mai ma latou ae avatu i ai ta’aiga ie mata pa-la e ta’i ai sua a le aufaigaluega. E o o fo’i i tulaga o fa’afiafiaga e taualuga ai le aso fiafia, e masani lava ona muamua le siva a le tama’ita’i fa’aipoipo ma lona aiga, ae taualuga i le siva a le ali’i fa’aipoipo ma lona aiga, ae o le fa’aipoipoga la lea, e ese lava fo’i lona fa’avae e pei ona tomumumu ai aiga o si ali’i fa’aipoipo, ua fa’amuamua le siva a le aiga o le tama fa’aipoipo, ma tatala ai loa le siva i le $1000, ae fa’amulimuli le siva a le tama’ita’i fa’aipoipo ma lona aiga, lea na tatala i le $1,500. Uu le gutu o le Fafige Faikakala i le ofo, i le mafai e le aiga o le teine fa’aipoipo ona latou faia lenei mea, ae o si tama fa’aipoipo e pei ona maua e le Fafige Faikakala i tala fa’alogo, sa auvasa mamao mai i fafo ona o le naunau ia matagofie lo la aso fiafia. Na ona manino lava o le mata o le vai i le fa’alogo a le Fafige Faikakala, tu loa i luga ma la’a i fafo ma alaga faapea, “eh, kaigoigo e, o le a lava le fia kele pe afai e le mafai oga faia, o age laia e fai le mataga gale, aua e pala le ma’a ae le pala upu ma kala”.