Ads by Google Ads by Google

VALOIA E TUA LE AVEA SHANE MA SIAMUPINI LUMANA’I

Ua valoia e le alii fusu Samoa o David ‘Tuaminator’ Tua le ono avea lea o le alii fusu mai Niu Sila o Shane ‘The Warrior’ Cameron o le isi siamupini i le paga mamafa i le lalolagi i se taimi e le o toe mamao.

O lea valoaga mai le alii fusu o David Tua na faalauiloa i se faatalatalanoaga ma le TV3 a Niu Sila i le vaiaso nei, ina ua fesiligia o ia e le au faasalalau i sona finagalo, e faatatau i le fusuaga a Shane ma le alii Amerika lea na faiaina ai i le tausaga na te’a nei, le slii o Monte ‘Two Gun’ Barrett.

“Ou te matua talitonu ua tatau ona maua se avanoa o Shane e fusu ai mo le fusi o le paga mamafa o le lalolagi i se taimi o le tausaga nei poo le tausaga fou fo’i, o ia o se tasi o tama fusu e faigata ona taofi pe faato’ilalo fo’i,” o le molimau lea a Tua e ui sa ia faato’ilaloina Shane i le la fusuaga i le 2009 i le taamilosaga 2, i le fusuaga sa faaigoaina o le ‘Fusuaga o le Senituri.’

“Afai e vaavaai i le toatele o tagata ta’uta’ua i le taaloga o faipelega, e leai lava se isi o i latou nei e le’i faiaina mataga, peitai e le avea na faiaina ma itu e taofia ai le toe avea ma fetu pupula i se taimi mulimuli ane, ma avea ai loa i latou ma siamupini o le lalolagi, ou te manatu e faapena foi Shane,” o le molimau lea a Tua.

O loo faagasolo i le taimi nei feutanaiga i le va o le pulega a Shane ma pulega a nisi o tama fusu mo le tau faamautuina o sana fusuaga i le faaiuga o le tausaga nei, ma vaavaai ai loa mo sana fusuaga i le fusi o le lalolagi i le tausaga fou.

E Tua, e faatasi lava ona fusu i le fusi o le lalolagi a’o umia e le alii siamupini o Lennox Lewis i le 2001, ma faiaina ai i ai ina ua mae’a lelei taamilosaga e 12 o le la taaloga mataina.

Ua valoia e Tua lana fuafuaga e toe foi i le maea i le masina o Tesema o le tausaga nei, poo le amataga foi o le tausaga fou ma le faamoemoe, toe tolu i le fa tausaga o loo totoe mo ia i le taaloga faipele ona litaea loa lea.

E lei mafai ona tali Tua ina ua fesiligia o ia e le au faasalalau, pe faamata na te taliaina le lu’i lea ua toe faatula’i e le alii o Barrett mo se la fusuaga lona tolu i se taimi oi luma, ae pe i ai fo’i sona manatu e toe fusu ia Shane i se la fusuaga lona lua, ina ua faatoilalo e Shane ia Barrett ma ia umi aai fusi na se’i mai e Barrett mai ia te ia.

Pau le faamatalaga a le alii o Tua, afai e talafeagai ai ma fuafuaga, o ni lu’i lelei ma talafeagai ia mo ia i le lumana’i, peitai e tatau lava ona faasolo i le sitepu ana fuafuaga pe afai e toe ulufale i totonu o le mae’a i le faaiuga o le tausaga nei.