Ads by Google Ads by Google

TALA I VAIFANUA


[ata: foa'i]

Pago Pago, AMERIKA SAMOA

 

FA’AMALO LE TAUIVI AFAI  -  TILALI SCANLAN I TUUGA A’AU OLIMIPEKA TOKYO, IAPANI

 

Maua se fesota’iga tau emeli ma le tamaitai na tauva i tu’uga a’au, i lona ulua’i taimi fa’avaomalo i le lalolagi ale Olimipeka ma ua ia fa’ailoa ai, “Sa ou tuuina i ai le atoaga o se taumafaiga, ae leai se faigofie ona tauva ai ma le au filifilia mai atunuu uma o le lalolagi i lenei tausaga.”

 

I lana taumafaiga i le Tokyo Olimipeka, na tulaga tolu ai o ia i le tu’uga 100m backstroke i lona taimi 1:10:01 ma ua ia soloia ai e ia lana taimi fa’amauina o se taimi sili ona vave mo lea tuuga e 1:13. O lana tuuga lea e fili faapitoa ai le vaega e tutu’u mo pine i le taimi mulimuli ane, e fua i le latou taimi ua fa’amauina.

 

“E fou lagona na tau oso mai a’o le’i amatalia le tu’uga, peita’I sa to’a le mafaufau ma taumafai e fa’amalolo atu lagona ia e ono fa’aletonu ai le taumafaiga. Na tofu loa i le vai tasi lava le mea ua i le mafaufau, Ia maua se taimi lelei o le fa’aiuga o le taumafaiga. Out e fa’afetai sa faia le mea sili, ua gata ai le taumafaiga, ae toe oso pea le la, e taumafai atili pea.” O sana tala lea e tusa o lana taumafaiga ma se lagona faia’e i lona mafaufau a’o tatalia le pa o le fana e amata le tuuga lea.

 

E tusa o lona taimi ua ausia, 1:10:01 o le taimi lea ua sili ona saoasaoa ai lana a’au, o se isi lea mea fiafia ia te ia lava o se tasi sa tauva i le Olimipeka 2020.

 

“O le vave lava lenei ua ou a’au ai i le 100 mita ole Backstroke, ae o le taimi fo’I ua ou tauva ai i le Olimipeka, o se fa’amoemoega ua leva ona koleni mai e fia ausia se taimi lelei, puupuu atu nai lo isi uma taumafaiga. Faafetai ua ausia nei lea tulaga, o se mea lelei fo’i.”

 

“E le’i i ai lava sou taimi ua maualalo atu ai i le 1:14. O lona uiga o lo’o aga’i pea i luma le taumafaiga. O lau taimi vave lava ua mae’a ai lea tuuga o lo ua fa’amauina e a’u lava ia, e 1:12:32 o lou fa’amoemoe la lea sa i ai, ia mafai ona ou maua le 1:11 peita’i o lea ua toeititi lava a ou ausia le 1:10 ma’ai.”

 

“E fa’amata e faigofie ona fa’amau le taimi o taumafaiga, ae leai se faigofie o i ai, pe a fua i le tele o le taimi na koleni mai ai, ina ia fa’aititia lea taimi sa lu’ia ai le fa’amoemoe ia fa’aitiiti pea le taimi e tutu’u ai, lea ua ausia ae le o maua ai le sini na fa’atu.O le fa’afetai i le tapua’iga ma le tali mai a le Atua e tusa o le mana’oga, ua fa’aauau pea ona fa’aitiitia le taimi ae o le pale e le’i ausia,” o se tala lea a Tilali i lana tusi mai le emeli.

 

“O se fiafiaga faia’e lava ia te a’u, o le va’aiga o fa’amaumauga o lou taimi, o se mea sili ua ou taumafaia mo lo’u atunuu na ou fanau ai. E tusa pe le o maua le sini, ae o la’u lava sini fa’atutu, ua usia, ia fa’aititia la’u taimi mo le taumafaiga i le Olimipeka.”

 

Ina ua fesiligia e tusa ai o le to’ai taunuu atu i le nofoaga o fa’aaumau ai i Tokyo, ae sa ia fa’ailoa mai, “O le to’ai taunuu i le nofoaga, ua matauina e ao ina matua usita’ia tulafono uma o le Covid-19, e le o faigofie ai ona e latalata i se tasi. O lo’o tulaga tutusa i matou uma i le fiafia ma le fa’agae’etia o lagona e fia tauva mo ‘ai o latou malo. E le o fa’anoanoa, ae ua taumafai e maua se mea aoga mai lenei fo’i mafutaga ma isi sui ta’a’alo, ia fa’amasani ma ia naunau i le soifua tauva i fa’agatama eseese. E aoga le va’ai ma aoaoina ai aua e leai se faigofie i so’o se tasi e tauva, e manana’o uma lava i le manumalo.”

 

“O le nofoaga e fa’amuamua lava le saogalemu ma o le ala lea o le fa’amamalu lelei ma usita’ia o Tulafono uma o le fa’aititia lava ona i ai se avanoa e te pesia mai ai i se tasi ua mua’i maua i le Covid-19.” 

 

I le tofia ai e avea ma se avefu’a a Amerika Samoa i le solo fa’aaloalo e tatala aloa’ia ai le Olimipeka 2021, sa fa’ailoa ai se lagona me’eme’e o le tamaita’i aua o se ulua’i taimi lea ua ia ave fu’a ai ile Agiagia a lona Malo.

 

“O se taimi muamua lea ua ou avea ai le Tagavai a Amerika Samoa, ma ua ese ai fo’i lagona. O mea uma ua nofo sauni e fai se mea sili e tauleleia ai le Malo ua ave fu’a ai. O lagona uma o le lotonuu ua faia’e ma ua aliali I foliga fiafia ua va’aia se to’atele a’o le mamao fo’i sa malaga mai ai, e taua ai lou malo i sau taumafaiga.Ua mamafatu le avega o lagona, e ao ina faia se mea sili e fa’amau ai lau taumafaiga  mo lou malo.”

 

“O le va’aiga i le taligamalo i lea lava taimi, o se isi lea mea ua fa’aosofia atili ai le fiafia, aua o le loto fesoasoani ma le fa’amasani ma le tausa’afia ua tuufa’atasia uma i le vasega o e na ta’imua mai e fa’afeiloa’ia i matou i taimi uma.E faafiafia tagata o latou uiga ma ua fa’amama ai le lagona fo’i lea, e fou lea nuu ma lana gagana ia i tatou mai Samoa.” 

 

“Talosia a’o fa’afiafiaina lava Amerika Samoa i se taumafaiga, e toe oso le la i le soifua taumafai, Pau o se mea ua gata ai le mafai i lenei tausaga. Fa’amoemoe i le Atua e aumaia le malosi ma le atamai e mafai ai ona fa’aleleia atili le taleni. O le tapuaiga sa outou faia mo la’u taumafaiga, e lagona atili ai le mafanafana o le alofa maim o a’u ma i matou uma le fanau a Amerika Samoa o lo ua o mai mamao e saili se ‘ai i lenei Olimipeka i Tokyo. Fa’amalo ma fa’afetai atu mo tatalo ma le tapua’iga mau”

 

“Ou te fa’afetai mo lo’u avanoa ou te faia ai se taumafaiga i se mea ua gata ai le mafai, ao silamio le lalolagi uma, afai ua lape le taumafaiga fa’amagalo le afafine, ae tau ina ia maua ai fo’i se vi’iga o le Atua i lenei fa’atasiga tele. Pau le mea o totoe nei o le maimoa i isi ta’aloga uma ma ia saogalemu le toe taliu atu i aiga ia Aukuso 2021, i le mae’a ai o lenei tauvaga. O sana toe tala mai lea.”

 

MAEA LE ULUA’I TAUMAFAIGA MICAH MASEI I LE OLIMIPEKA I TOKYO

 

O Micah Masei le tasi o tatou talavou sa sauva i le tu’uga a’au a ali’i i le Olimipeka. Ua mae’a lana taumafaiga na tulaga muamua ai i le vaega sa lato tauva a’au fa’atasi ai ma le sui mai Brunei o Muhammad Isa Ahmad ma le sui a’au mai Tonga o Amici Fonda. E ui la ina lelei lana taumafaiga lea i le latos laina o e na tutu’u fa’atasi, ae sa le’i toe maua e ia le saoasaoa o lana a’au lea na fa’amauina ai lona taimi e 1:04:81, ua maua ane lona taimi e 1:04:93.

 

O le tu’uga fo’i lea sa tauva ai Micah Masei o le 100 mita backstroke a Alii, ma sa faia lea I le aso Toona’i na te’a nei. O le Fale Tele fou o Iapani mo Tu’uga A’au lea na fa’atautaia ai le tauvaga a’au, au faaigoaina o le Tokyo Aquatics Center.

 

O le atali’i lenei o le atunuu sa a’oina fa’apitoa i le Iunivesite o Hawaii ma sa fa’atalia mai e ia le masi’i aut o nisi o le ‘au malaga mai Amerika Samoa nei, ma latou o fa’atasi ai i le ammalata mo Tokyo i lenti ‘au ta’a’alo Olimipeka.

 

O se tala mai le ali’i talavou, sa ia fa’ailoa ai, “E ui e le o maua se pine mai le taumafaiga, ae pau le mea ua mautinoa, sa taumafai lava le mea sili, ua fai si umi o taofia fo’i koleniga na silia ma le 6 masina, o le isi lea fa’auilavea i le fa’amoemoe, ae le o se fa’ameo pe alo ai le fa’amoemoe sa tatau ona taumafai pea lava mo se mea sili e ta’ua ai le atunuu pele. O lea la ua fa’afetai sa tulaga muamua i le matou tu’uga, ae ua le ausia ai ona ausia la’u taimi sili ona pu’upu’u ua fa’amauina mo lea tu’uga.”

 

O le taimi fo’i lea a Masei na ia fa’atinia ai lana taumafaiga muamua, ua le gafatia ai e ia ona maua sona avanoa e saili siamupini ai i lea tu’uga 100 mita backstroke, lea na toe sailia i le aso Sa na soso’o ai ma le aso na faia ai tuuga muamua.

 

E ui ina e le o to’atele nisi na fa’ataga i totonu e maimoaina taumafaiga a tama ma teine ta’a’alo mai malo eseese, ae ua fa’ailoa mai, “E le o fa’aititia ai le taua tele ma le patipatia e atunuu uma o taumafaiga a latou tagata ta’a’alo. Maualuga lava le sipili o le Olimipeka i taumafaiga a tama ma teine ta’a’alo, fa’apea fo’i ma e na mafai ona ulufale e maimoaina ta’aloga.”

 

FA’AMANUIA AO MAMALU O LE MALO SAMOA - PALEMIA FOU FIAME NAOMI MATAFA’AFA

 

I le saunoaga mamalu a le Ao Mamalu o le Malo o Samoa Tuto’atasi i le afiafi o le aso Faraile lea ua mae’a fa’asalalauina fa’alaua’itele mai i ala ea o Fofoga Fa’asalalau ma Alaata o Televise ma Upega Tafailagi, ua ia fa’amanuia mai ai le nofoa’iga a le tamaitai Palemia Fou o Samoa, Fiame Naomi Mata’afa, le sui tofia e ta’ita’ia le Vaega Fa’aupufai o Malo a le FAST.

 

“O lenei fo’i le vaitausaga ua fa’amauina i tala fa’asolopito o Samoa, ua fa’ato’a tula’i mai ai se tama’ita’i e avea ma Palemia e o le Malo Tuto’atasi o Samoa,” o se tala fiafia lea a le Ao Mamalu o le malo o Samoa.

 

Ua le gata i le tamaitai Palemia fou ae ua faapea foi ona ia fa’amanuia ma fa’amalo le onosa’i ma le lava papale fo’i o lana Kapeneta ma sui tofia o le Palemene atoa. Ua ia fa’alauiloa ai fo’i ma le tatalaina aloa’ia o le nofoaiga fou a le Palemene ina ia fa’ataunuu le fa’atautoga o sui tofia ta’itasi.

 

Ua mae’a le fa’aiuga, ma ua talia fo’i ma le filemu e le Palemia fa’aauau o le faigamalo a Samoa, lona tula’i ese mai le nofoa, ae tapena le Palemene ma le malo o Samoa e fa’atautaia e le tamaitai Palemia fou.

 

O le fa’afetai fo’i sa lagona i le tautalaga, aua sa tele fo’i se aoga o le faigamalo a le HRPP mai lona tula’i mai e faafoe le folauga a Samoa. 

 

O le iuga o le faigapalota a Samoa ia Aperila 09,  lea ua fa’ato’a fa’amautu mai lona iuga ua manumalo le FAST i ona nofoa e 26 i le na’o le 18 o nofoa a le HRPP.

 

Ua fa’aaogaina fo’i le avanoa o le malelega a le afioga Ao o le Malo o Samoa Tuimalealiifano Sualauvi ll e aumai ai sona taofi e tusa o le tele o le fa’asea ma fa’aupuga na felafoa’i ona o le vaitaimi fita a’o fesoua’iga vaega fa’aupufai o malo ona o le palota ma ona fa’amasinoga sa fa’atulaga.

 

O le fa’aiuga na tuuina atu e le fa’amasinoga, lea ua fa’aleaogaina ai le fa’atautoga ma le fonotaga a le palemene fou i lalo o le fale’ie i Tiafau, ua ia fa’ailoa mai, “E le o se fa’aiuga e fa’atauagavale ai se taofi, ou te le iloa ona tautua le Malo pe tula’i fo’i i lenei tofiga ta’ita’i sinia o le atunuu. O lea vaitau o lo’o lutaluta le tai ma ua taumuaina le folauga i fatiga o le tai. E fa’anoanoa ona o lafoga e fa’atutu mai sa tatau ona ou faia atu fa’aiuga e fa’atautaia ai le Malo. E le so’ona gaoia ta’ita’i e to’a i ai le sousou. O le fetalaiga e mapu i ai Samoa i ona mafatia. O le ta’ita’i e faifailemu ae matau le taimi tonu e sofa’i ai se taofi. Ia le vevesi lava le atunuu. E leai se faigofie o so’o se fa’aiuga e ono a’afia le nofo lelei o le atunuu. E seu le manu ae taga’i i le galu.”

 

Ua mae’a nei le faigamalo a le Palemia o Samoa Tuilaepe Sailele Malielegaoi ma lana vaega fa’aupufai o le HRPP. O le ali’i palemia lea o Samoa ua iloga lona tula’i mai aua e mau fa’ailoga o ia i mataupu tau le Tamaoaiga ma ala e sailia ai i tulaga o atina’e eseese ma le sailia o tupe e auala mai i teugatupe teu mau.

 

Na amata mai ona tula’i le HRPP o lo’o tele mea o nofo aitalafu ai le Malo o Samoa ma sa vaivai fo’i ana tupe maua mai ana atina’e ma ala eseese sa mafai ona fa’atupe ai, ma ua a’emalo faiva ma avea ma se tasi o malo ua sili ona televave ona fa’aleleleia o lona tamaoaiga i le vasa pasefika.

 

I le tautalaga mulimuli a Palemia Tuilaepa Malielegaoi, sa ia talosagaina ai le tamaitai Palemia Fiame Naomi Mata’afa ina ia tuuina atu aso e fiu mo le latou faigamalo e tu’ua ai pou sa galulue ai, ae ia sologa lelei fo’i le fesuia’iga o le pulega i matagaluega eseese o le malo ma le Ofisa o le Palemia.

 

O le taeao nei i le Malae i Ti’afau, e tauaofia ai le Palemene a Samoa, i lalo o le ta’ita’iga a le Palemia Fou, Fiamea Mataafa.