Ads by Google Ads by Google

Ta’utino Komesina e le o lava tupe mo le paketi a le Ofisa o Leoleo

 Le afioga i le Komesina o Leoleo ia Save Liuato Tuitele, ma le sui komesina, susuga Vaimaga Maiava  [ata AF]
ausage@samoanews.com

Na fa’amanino e le Komesina o Leoleo i luma o le Komiti So’ofa’atasi o le Paketi a le fono i le taeao ananafi, e le o lava le paketi a le Ofisa o Leoleo e fa’atino ai ana galuega mo le tausaga tupe fou, pe a fa’atusatusa i le aofa’i o le paketi sa latou tu’uina atu i le Ofisa o le Paketi, ma le aofa’iga lea ua tu’uina mai latou te galulue ai.

 

Saunoa le afioga a Save Liuato Tuitele e fa’apea, o le paketi a le ofisa o Leoleo o lo o i ai i le taimi nei e $8.2 miliona, o le paketi lava fo’i lea sa latou toe talosagaina mo le tausaga tupe fou 2017, peita’i e na o le $7.8 miliona le aofa’i o le paketi sa tu’uina mai latou te galulue ai mo le isi tausaga tupe fou.

 

“E ui i le fa’aitiitia o le matou paketi mo le tausaga tupe fou 2017, ae ua matou malilie lava i ai, ona o lo o matou iloaina fo’i tulaga tau fa’asoasoa o le tamaoaiga o le malo, aemaise ai o le tele o manaoga o lo o taumafai le malo e ave i ai la latou fa’amuamua, ae o lo o matou galulue pea ma le kovana mo le sailia o ni isi alagatupe e fesoasoani ai mo manaoga e mulimuli mai a le matagaluega”, o le saunoaga lea a le afioga a Save.

 

O ni isi o vaega i totonu o le paketi a le ofisa o Leoleo e le o i ai e pei ona maitauina e ni isi o sui o le Komiti So’ofa’atasi o le Paketi a le fono, o se vaega tupe e totogi ai ova taimi o leoleo, leai se tupe o fa’aagaga e fa’atau ai toniga a leoleo, ae o lo o fa’atau lava e le Leoleo lana toniga, leai fo’i se tupe e fa’a faigaluega ai ni Leoleo fou e fesoasoani i le manaoga o le le lava lea o Leoleo.

 

Ina ua fesiligia e le afioga i le senatoa ia Magalei Logovi’i le mafua’aga e ala ai ona fa’atau e le Leoleo lana toniga, na saunoa ai Save e fa’apea, e le o i ai se vaega tupe e fa’atau fa’atasi ai le toniga a le Matagaluega, e oo fo’i i toniga fa’apitoa e tatau ona fa’aaoga e leoleo i luga o le auala e pei o ‘safety vest’, e le o toe i ai fo’i ni toniga fa’appea a leoleo, ona o ni isi o ofu tuai sa i ai ua leaga ma masaesae, ae o lo o galulue pea le Ofisa e tau saili mai se alagatupe feterale e tali ai i nei manaoga.

 

Saunoa Magalei e fa’apea, o lona popolega o lo o i ai, o lo o tele ina tutu solo Leoleo i luga o le alatele i taimi e gasolo ai fanau i aoga i le taeao ma le afiafi e aunoa ma le laeiina o ni a latou ‘safety vest’ e fa’a faigofie ai i ave ta’avale ona iloa i latou, ina ne’i alu atu se ave ta’avale e tau fa’aletonu le vaai ma so’a se Leoleo, ona a’afia lea o le ave ta’avale ae mafua mai i le fa’atamala o le matagaluega i le le fa’aatoatoaina o toniga a ali’i ma tama’ita’i Leoleo.

 

O se tasi o vaega sa fesiligia e sui o le Komiti Soofa’atasi, o le mafua’aga ua ala ai ona aveese ni isi o avanoa faigaluega sa i ai i totonu o le paketi mo le tausaga tupe lenei, a o lea ua fa’ailoa mai ua aveese mai le paketi o le tausaga tupe fou.

 

Saunoa Magalei e fa’apea, na te fia iloa pe aisea ua aveese ai nei avanoa faigaluega, pe le o mana’omia e le Ofisa ni tagata faigaluega fou, a o lea na te fa’alogoina le tele o le manaoga mo ni Leoleo fa’aopoopo i le Ofisa e sui tulaga i le to’atele o isi Leoleo ua fa’amavae ma malolo.

 

Saunoa Save e fa’apea, e ui e le o lona Ofisa na aveesea avanoa faigaluega e pei ona fesiligia, ae o le mea moni e fia fa’ailoa, o lo o matua manaomia lava ni isi tagata faigaluega fa’aopoopo mo le vaega o Leoleo, e sui tulaga i leoleo ua malolo litaea ma fa’amavae fo’i isi.

 

“E pei ona silafia, e ese mai ai lava le galuega fa’a Leoleo mai isi uma galuega, e mafai ona saili mai soo se tagata na te fa’atumuina isi galuega, ae o le galuega fa’a Leoleo, e le mafai ona soona sailia mai se tagata e fa’atumuina le avanoa, sei vagana ua aoga lelei lena tagata i aoga fa’a Leoleo ma fa’au’u mai ai, ona fa’atoa agava’a lea i le galuega”, o le saunoaga lea a Save.

 

Sa ia taua fo’i le i ai o ni Leoleo tuai se to’a 3 na malolo mai a latou galuega, ae ua toe valaauina e le Matagaluega e galulue, ona o le manaoga ua tula’i mai i le mana’omia lea o ni Leoleo fou e fa’aopoopo i le auaunaga a le Ofisa.

 

Ae na saunoa Magalei e fa’apea, o lona popolega tele o lo o i ai, ina ne’i tuai ona toe fa’atumu avanoa o Leoleo ua litaea ma fa’amavae, ae le atoa ai Leoleo latou te fa’atinoina le galuega o le puipuiga lea o le saogalemu lautele o le atunu’u.

 

O le afioga i le ali’i faipule ia Vailoata Eteuati Amituana’i na ia fesiligia le ali’i komesina e fa’atatau i se alagatupe faapitoa e tu’u ese, e totogi ai ova taimi o Leoleo.

 

Saunoa Vailoata e fa’apea, i le avea ai o le mataupu i ova taimi o Leoleo e le o totogia, o se tasi o mataupu ua tele taimi e talanoa ma iloiloina e le Fono, ua ia manatu ai, na pau le auala e mafai ona uia e foia ai lea fa’afitauli, o le fa’aagaga o se vaega tupe i totonu o le paketi a le Ofisa o Leoleo e fa’apitoa mo le totogiina o ova taimi o Leoleo.