Ads by Google Ads by Google

Vavau a Samoa: O LE 'ANA O SEUAO I SA'ANAPU, Vaega #3

Malo le onosa'i i le uo ma pa'aga o la tatou polokalama, ae alo mai loa o le toe fa'aauauina lenei o la tatou Vavau mai le vaiaso na te'a nei. Ua lata mai lava i uta le fua ma ua taliga logo le vala'au o lo o alaga mai pea, ma e saputu mai lava vala'au a le tagata o lo o alaga, ae o le taimi lea o lo o fili 'afa a le isi toeaina i tua o lona faleo'o, ona sa'i lea o le toeaina ma fa'apea ana 'upu, "e! ta le lava fa'alumaina i nei mau fa'aupuga e fai mai pea i aso uma fai mai o Vaovasamanaia lea fo'i ua sau ma le isi ava fou, o lona uiga ea e leai ni manaia o Sa'anapu latou ia.?"

Fai mai e fai le tala lea a le toeaina ae o lo o lagona lelei atu lava e Logona, o lea na tamo'e ai loa Logona ma aumai le pupu i lo latou fale, ona toe tamo'e ane loa lea ma ia i le mea o lo o fili 'afa ai le toeaina, ma e fetaui lava lona taunu'u ane ae oso ane loa fo'i ma le fua i gatai tonu o le fale o le toeaina, ona ia lia'i lea e le tama o le pupu ma alu atu lava ua ta'atia i le liu o le va'a i tafatafa o Vaovasamanaia ma lona faletua fou, ona alaga lea o Vaovasamanaia e taofi le fua ae avatu ia te ia le pupu. Ua tau fai tutu uma va'a o le fua ae o le taimi lea ua avatu le pupu na togi atu e Logona ia Vaovasamanaia, ua va'ava'ai atu Vaovasamanaia i le pupu ona fai atu lea i lana tulafale e sasa'a i lalo o le pupu, ma ina ua sasa'a i lalo na ia va'aia o le pupu toto, ona ia iloa lea o lona faletua lona selau e le o se taupou, o lona ita tele i le mea ua tupu na ia una'i ai ia te ia i le sami i Sa'anapu.

Fai mai ua tia'i le faletua lona selau o Vaovasamanaia i Sa'anapu ae fa'aauau pea le malaga i Manono, ua malie atoatoa lona loto i ona faletua e 99 ua i ai, ma fai mai le mau a Manono o le mafua'aga lena o le "Paleso'o" o lo o i ai nei i Lepuia'i, lea e na o le 99 ma'a o lo o i ai i le pa, e fa'amanatu ai le faletua lona selau lea na tia'i i le sami i Sa'anapu. Fai mai ona fa'aauau lea o le malaga a Logona ua la fetaia'i ma le tama'ita'i o Sinaleavele lea sa nofo i uta o Vailima i le fanua e igoa o Avele. Fai mai o se tasi aso na alu ai Logona e ta'alo i ta'aloga sa faia i Vaimauga, na la fetaui ai ma Sinaleavele, ma ua alofa tele le teine ia Logona, ona ia ave lea i ai o le 'ula na aumai i le isi manaia e igoa ia Tunavaetele o Vaimauga, fai mai ua alu le ta'aloga, ona iloa atu lea e Tunavaetele o lana 'ula sa ave ia Sinaleavele o lo o 'ula mai ai Logona, ona ita lea o lona loto ma latou taupulepule ai ma isi manaia sa i ai e fasioti Logona, ona o le mea leaga na ia faia ia Vaovasamanaia. Fai mai ona latou fasitele lea o Logona ina ua uma le ta'aloga ma sulu ai Logona i le taufusi, ma o i'ina na maua ai le igoa o le nu'u o Taufusi e pei ona i ai nei. Soifua.